Të rinjtë kanë nisur të mblidhen që në mëngjes në sheshin “Skënderbej” në Tiranë, ndërsa protesta pritet të nisë pranë mesditës.
Ata kanë përsëritur thirrjet kundër qeverisë dhe kryeministrit Edi Rama. Disa prej tyre janë ngjitur mbi monumentin e heroit kombëtar Skënderbeu, ku kanë valëvitur flamurin shqiptar.
Ndërkohë, ashtu si në ditët e mëparshme, policia ka kryer patrullime në kryeqytet dhe shoqërime të personave që dyshohet se mund të përfshihen në incidente gjatë protestës.
Në pritje të tubimit, disa biznese kanë nisur të vendosin mbrojtëse hekuri në dritare dhe vitrina. Pronarët synojnë të mbrojnë ambientet dhe pronën e tyre nga dëmtimet e mundshme, pas incidenteve të regjistruara gjatë protestave të ditëve të fundit.
