Një ngjarje jo e hijshme ka ndodhur mbrëmjen e djeshme në qytetin e Vlorës, pasi disa të rinj janë përleshur me efektivët e policisë në sy të turistëve.
Dy efektivë kanë përfunduar në spital me fraktura në trup, ndërsa janë arrestuar dy vëllezërit me inicialet R. P., 29 vjeç dhe K. P., 23 vjeç, që ishin pronarë të skuterave dhe ushtronin aktivitetin e tyre pa licensë. Gjithashtu janë shpallur në kërkim personat e tjerë të përfshirë në këtë konflikt.
Ngjarja ka ndodhur mbrëmjen e djeshme në Lungomare, ku punonjësit e qarkullimit rrugor në këtë aks kanë bërë kontrolle për përdorimin e kaskave tek motorët elektrikë dhe monopatinat dhe kanë konstatuar shtetasin D. J., në kundravajtje, të cilin e kanë ndaluar.
Gjatë komunikimit të kundravajtjes dhe masës administrative, janë afruar dy pronarët e subjektit ku shtetasi D. J. kishte marrë motorin elektrik me qera, të cilët së bashku me shtetas të tjerë kanë debatuar verbalisht me punonjësit duke i kundërshtuar e më pas i kanë goditur me grushta.
