Polikanët shqiptarë nuk i kursejnë akuzat ndaj njëri-tjetrit. Akuza të forta, e shpeshherë vënë në target edhe familjarët e tyre. Por kur vjen puna të drejtësia ngjan se bëhen bashkë dhe përpiqen të shfrytëzojnë strategjitë e njëri-tjetrit, për t’ia hedhur sa më lehtë e sa më shpejt ligjit.
E duket se në mënyrë po vepron ish-kryeministri Sali Berisha, i cili po hetohet nën dyshimet për korrupsion lidhur me procedurat e privatizimit të ish-kompleksit sportiv Partizani.
Përmes avokatëve po tenton të shmangë pagesën në gjykatë për marrjen e akteve të dosjes, duke iu referuar precedentit të ish-ministrit të Shëndetësisë Ilir Beqaj, i cili aktualisht ndodhet në pranga nën dyshimet për korrupsion me fondet e BE-së kur drejtonte agjencinë SASPAK.
Ishte ky i fundit, që refuzoi disa kohë më parë pagesën për marrjen e dosjes që lidhej me aferën e sterilizimit, për të cilën është marrë zyrtarisht i pandehur nga SPAK për shpërdorimn detyre, kryer në bashkëpunim. Atëkohë Beqaj, ndaj të cilit ishte caktuar masa e detyrimit për paraqitje, e ndoqi cështjen në rrugë gjyqësore, madje pati ditë që u paraqit në zyrat e SPAK dhe studionte aty materialet për orë të tëra.
Këtë të enjte në gjykatën e Posacme, u zhvillua një seancë për ish-kryeministrin Sali Berisha, gjatë së cilës SPAK duhet të njoftonte për hetimet e kryera përgjatë 2 muajve të fundit. Avokatët kërkuan marrjen e dokumentave, por gjykata i njoftoi se duhet të paguanin.
Genci Gjokutaj e kundërshtoi këtë fakt, duke sjellë në vëmendje të institucioneve të drejtësisë precedentin Beqaj.
“Kolegu ka ardhur në gjykatë dhe ata i kanë vënë kusht që këto akte mund të merrem kundrejt pagesës. Të kuptohemi ky nuk është problem apo dëshirë për të mos paguar, edhe cështje standarti. Sepse ligji i ka ndarë shpenzimet gjyqësore në fund të gjykimit. Kanë edhe praktikën e zotit Beqaj që ja kanë dhënë aktet”, tha z.Gjokutaj.
Avokati shtoi më tej se “ne i kemi të domosdoshme dhe të nevojshme aktet”.
I pyetur lidhur me zgjatjen e afateve të hetimit deri më 2 tetor 2024, Gjokutaj deklaroi:
“Rruga e zvarritjes. Afërmendsh gjykata bën atë që thotë SPAK. Duhet të dini, këto gjera i di Edi Rama dhe Irena Maneku. Mund t’iu drejtoheni atyre, nëse do të mund t’iu përgjigjen. Shoh që arsyeja është thellësisht serioze për ta”, theksoi më tej avokati.
Gjokutaj tha se avokatët duhet të tërheqin plot 12 fashikujt, por më tej ironizoi se “proceset politike janë ata që kanë rendimentin më të lartë, sepse printojnë letra pa lidhje”.
