Deputetja e PD, Jorida Tabaku, duket se nuk ka dashur ta lërë politikën jashtë as gjatë vizitës në Manastirin e Zvërnecit, ku ndodhej së bashku me deputetë shqiptarë dhe eurodeputetë.
Të pritur nga prifti i Kishës së Shën Mërisë, Atë Jan Tereziu, të pranishmit u njohën me historinë e Manastirit dhe ambientet e tij. Por vizita mori një tjetër drejtim kur Tabaku vendosi të hapte çështjen e investimeve të parashikuara në zonën e Zvërnecit, duke deklaruar se pikërisht për këtë temë kishte mbërritur aty së bashku me kolegët e Parlamentit Europian.
“Ky është një vend i Zotit. Ky është mbajtur dhe ruajtur nga Zoti edhe në kohë të vështira të komunizmit. Tani debatin për këtë investimin besoj se e keni ndjekur, sepse ne për atë punë kemi ardhur me kolegët e Parlamentit Europian”, u shpreh Tabaku.
Tentativa për ta zhvendosur diskutimin nga historia e Manastirit tek debati politik nuk kaloi pa reagim. Një prej të pranishmëve ndërhyri duke i kujtuar deputetes se “nuk bëhet politikë brenda kishës”.
Tabaku këmbënguli se nuk po bënte politikë, por vetëm po drejtonte një pyetje, duke kërkuar të dinte nëse përfaqësuesit e Kishës ishin konsultuar për investimin, për shkak të afërsisë së tij me zonën.
Përgjigjja e Atë Jan Tereziut ishte e qartë dhe nuk la shumë hapësirë për vijimin e debatit.
“Dua të të falënderoj për pyetjen, por brenda ambienteve të kishës, sidomos në mënyrë absolute, por edhe jashtë në Manastir, të tilla muhabete nuk bëhen”, tha ai.
Kështu, përpjekja e Tabakut për protagonizëm politik edhe brenda shtëpisë së Zotit nuk mori “bekimin” e priftit. Ndoshta ky episod do t’i shërbejë deputetes së PD-së si një kujtesë se retorika e zakonshme politike para kamerave që e shoqërojnë thuajse kudo, nuk mund të përdoret vend e pa vend.
