Një ndryshim i madh mund të jetë në horizont për UEFA Champions League. Pas më shumë se dy dekadash bashkëpunimi me Adidas, UEFA po shqyrton kalimin e kontratës për topat zyrtarë të ndeshjeve te Nike.
Lajmi është konfirmuar përmes një njoftimi zyrtar, ku bëhet e ditur se UEFA ka hyrë në negociata ekskluzive me Nike, me synimin që kompania amerikane të bëhet furnizuesi zyrtar i topave për të gjitha garat e klubeve të meshkujve nga viti 2027 deri në 2031.
Ky zhvillim mund të shënojë fundin e një epoke, pasi topi ikonik me yje i Adidas ka qenë simbol i Ligës së Kampionëve që prej vitit 2001. Ndryshimi i mundshëm pritet të prekë jo vetëm Champions League, por edhe UEFA Europa League dhe UEFA Europa Conference League, duke forcuar ndjeshëm praninë e Nike në futbollin evropian.
Deri më tani nuk ka detaje mbi dizajnin e topave të rinj, ndërsa në prapaskenë po zhvillohet një garë e fortë tregtare mes dy gjigantëve të industrisë sportive. Nëse marrëveshja finalizohet, ajo do të përbënte një fitore të madhe për Nike dhe fundin e një partneriteti të gjatë për Adidas.
