Izraeli ka thirrur të hënën ambasadorin e Italisë për të protestuar, pasi ministri i Jashtëm italian Antonio Tajani dënoi “sulmet e papranueshme” të Izraelit ndaj civilëve në Liban gjatë një vizite në Bejrut, tha një burim diplomatik italian.
Tajani shkroi në rrjetin X se ndodhej në Bejrut për të “shprehur solidaritetin e Italisë pas sulmeve të papranueshme të Izraelit kundër popullsisë civile”.
Ai bëri thirrje për dialog mes Libanit dhe Izraelit dhe për një “armëpushim të domosdoshëm dhe të qëndrueshëm”, duke shtuar: “Një përshkallëzim tjetër si ai në Gaza duhet të shmanget me çdo kusht.”
Gjatë vizitës, Tajani zhvilloi bisedime me presidentin libanez Joseph Aoun dhe ministrin e Jashtëm Youssef Raggi.
Libani u përfshi në luftën në Lindjen e Mesme pasi grupi Hezbollah, i mbështetur nga Irani, lëshoi raketa drejt Izraelit më 2 mars. Izraeli reagoi me sulme në shkallë të gjerë dhe një ofensivë tokësore.
Javën e kaluar, qeveria italiane kishte thirrur ambasadorin izraelit pasi deklaroi se forcat izraelite kishin qëlluar me të shtëna paralajmëruese ndaj një kolone të paqeruajtësve italianë të OKB-së në Liban, duke dëmtuar të paktën një automjet, por pa shkaktuar të plagosur.
