Papa Leo XIV ka reaguar ndaj kritikave të presidentit amerikan Donald Trump, i cili e ka quajtur atë “të dobët për krimin” dhe “të keq për politikën e jashtme”.
“Nuk kam frikë nga administrata Trump apo të flas me zë të lartë për mesazhin e Ungjillit, që besoj se është arsyeja pse jam këtu, ajo që Kisha duhet të bëjë,” ka deklaruar Papa për gazetarët në avionin papnor, përpara udhëtimit të tij drejt Algjerisë.
“Ne nuk jemi politikanë. Nuk merremi me politikën e jashtme nga i njëjti këndvështrim si ai, por unë besoj në mesazhin e Ungjillit, si një paqebërës,” ka shtuar ai.
Deklaratat e Papës janë publikuar nga një gazetar i OSV News në platformën X.
Ndërkohë, kritikat e Donald Trump kanë ardhur në një postim në rrjetet sociale të dielën në mbrëmje dhe duket se janë nxitur nga deklaratat e fundit të Papës, ku ai kishte kritikuar luftën SHBA–Izrael kundër Iranit.
