Sali Berisha ka paralajmëruar një fazë të re të “disiplinës digjitale” brenda Partisë Demokratike. Në një takim me kryetarët e degëve, ai u kërkoi drejtuesve lokalë të përdorin më intensivisht rrjetet sociale dhe madje të shkarkojnë aplikacione të inteligjencës artificiale, si ChatGPT apo Gemini, për t’u përballur – sipas tij – me propagandën e qeverisë.
Berisha tha se përdorimi i rrjeteve sociale nuk duhet të mbetet më një zgjedhje personale për drejtuesit e strukturave, por një detyrim politik. Madje, sipas tij, kjo do të kontrollohet.
“Tani që të jemi të hapur, përdorimi i rrjeteve sociale do kontrollohet. I përdorni apo nuk i përdorni. Është detyrim për atë që drejton dhe ka një post. Përndryshe, të rrijë i heshtur,” u shpreh Berisha.
Ai argumentoi se opozita ndodhet në një betejë të vështirë dhe duhet të përdorë çdo mjet legjitim për të denoncuar, sipas tij, skandalet e qeverisë. Në këtë kuadër, lideri demokrat akuzoi kryeministrin Edi Rama se kontrollon pjesën më të madhe të mediave.
“Ne jemi në një betejë të vështirë. Ne duhet të përdorim çdo mjet legjitim. Ju nuk mund të imagjinoni se çfarë manipulimi bën Rama me 90 përqind të mediave, me lista,” tha ai.
Në thelb, mesazhi i Berishës për drejtuesit e tij ishte i qartë: në politikën e sotme nuk mjafton vetëm aktiviteti në terren. Tani kërkohet edhe aktivitet në Facebook, X apo platforma të tjera – dhe nëse është e nevojshme, edhe me ndihmën e inteligjencës artificiale. Në fund të fundit, edhe beteja politike duket se po bëhet gjithnjë e më shumë një betejë algoritmesh.
