Inter ka krijuar një epërsi prej 12 pikësh në krye të Serie A, ndërsa kanë mbetur edhe pesë javë deri në përfundim të sezonit 2025–26. Kjo situatë i jep mundësinë skuadrës së drejtuar nga Cristian Chivu që ta sigurojë matematikisht titullin që në fundjavën e ardhshme.
Trajneri rumun është shumë pranë fitimit të ‘Scudetto’-s në sezonin e tij të parë të plotë në stol, me ‘Nerazzurrët’ që kanë grumbulluar 78 pikë pas 33 javësh. Ata janë 12 pikë përpara Napoli dhe 15 më shumë se AC Milan, të cilët kanë edhe një ndeshje më pak të zhvilluar.
Fitorja bindëse 3-0 ndaj Cagliari të premten mbrëma, e kombinuar me humbjen 2-0 në shtëpi të Napolit ndaj Lazio, ka rritur ndjeshëm shanset e Interit për titull.
Zikaltrit mund ta vulosin matematikisht kampionatin në ndeshjen e radhës si mysafir ndaj Torino, megjithëse gjithçka varet edhe nga rezultatet e rivalëve.
Për ta siguruar titullin javën e ardhshme, Interi duhet të fitojë ndaj Torinos, ndërsa Napoli të humbasë pikë në shtëpi përballë Cremonese dhe Milani të gabojë në njërën nga përballjet kundër Hellas Verona ose Juventus.
Ekziston edhe mundësia që Interi të shpallet kampion me një barazim ndaj Torinos, por në këtë rast kërkohet që Napoli të mposhtet nga Cremonese dhe Milani të mos grumbullojë më shumë se tri pikë në dy ndeshjet e ardhshme.
