Spanja do të përjetësojë triumfin në Kupën e Botës 2026 edhe përmes një monedhe përkujtimore. Ministria e Ekonomisë, Tregtisë dhe Biznesit ka miratuar zyrtarisht emetimin, prerjen dhe hedhjen në qarkullim të një monedhe speciale kushtuar fitores së kombëtares spanjolle në Botërorin e zhvilluar në Shtetet e Bashkuara, Meksikë dhe Kanada.
Vendimi është publikuar në Gazetën Zyrtare të Shtetit, ndërsa prodhimi i monedhës do të realizohet nga Royal Mint. Në total do të emetohen deri në 50 mijë monedha, secila me vlerë nominale 5 euro, ndërsa çmimi i shitjes do të jetë 60.33 euro, pa TVSH.
Në pjesën e përparme të monedhës do të jetë portreti i mbretit Felipe VI, së bashku me mbishkrimin "Felipe VI Rey de Espana" dhe vitin e prerjes 2026.
Ndërkohë, në anën e pasme do të vendoset logoja zyrtare e FIFA World Cup 2026, ndërsa në pjesën e poshtme do të lexohet mbishkrimi "Campeones del Mundo" (Kampionët e Botës).
Kombëtarja spanjolle fitoi titullin e saj të dytë botëror më 19 korrik, pasi mposhti Argjentinën 1-0 në finalen e luajtur në stadiumin MetLife, falë golit të Ferran Torres në kohën shtesë. Pas suksesit të vitit 2010 në Afrikën e Jugut, "La Roja" riktheu trofeun e Kupës së Botës në Madrid pas 16 vitesh.
