Presidenti ukrainas Volodymyr Zelensky ka deklaruar se çështja e çlirimit të Krimesë së pushtuar nga Rusia nuk është aktualisht pjesë e negociatave, edhe pse gadishulli mbetet pjesë integrale e territorit të Ukrainës.
Në një intervistë për Fox News, Zelensky u pyet nëse çështja e Krimesë është rikthyer në agjendën e bisedimeve, ndërsa ai u përgjigj se për momentin kjo çështje nuk është diskutuar.
“Është për të ardhur keq, jo. Do ta shohim, nuk e di. Toka është shumë e rëndësishme, është territori ynë, është historia jonë, ka të bëjë me shtëpitë tona. Por gjëja më e rëndësishme është të mos humbasim njerëz”, tha presidenti ukrainas.
Zelensky bëri të ditur gjithashtu se gjatë takimit të fundit me presidentin amerikan Donald Trump në Shtëpinë e Bardhë, diskutimet u përqendruan te forcimi i mbrojtjes ajrore të Ukrainës, përfshirë licencat për prodhimin e raketave interceptuese Patriot, si dhe iniciativa të tjera që mund të ndihmojnë Kievin.
Takimi mes dy liderëve u zhvillua me dyer të mbyllura, pa praninë e mediave dhe pa deklarata publike pas përfundimit të tij. Zelensky qëndroi më shumë se një orë në Shtëpinë e Bardhë.
Më herët, presidenti ukrainas kishte deklaruar se prioritetet kryesore të vizitës së tij në SHBA ishin forcimi i kapaciteteve për përballimin e sulmeve balistike dhe thellimi i bashkëpunimit strategjik mes Ukrainës dhe Shteteve të Bashkuara.
