Një shpërthim ka ndodhur në Portin e Damietës, në Egjipt, duke përfshirë një objekt lundrues për ruajtjen e gazit natyror të lëngshëm (LNG), në pronësi dhe operim të Shteteve të Bashkuara, me flamur të Ishujve Marshall.
Lajmi u bë i ditur nga kompania e sigurisë detare Ambrey, e cila konfirmoi incidentin, por nuk dha detaje mbi shkakun e shpërthimit, dëmet e shkaktuara apo nëse ka persona të lënduar.
Në një njoftim të veçantë, ICC Shipping bëri të ditur se shpërthimi ndodhi gjatë operacioneve të shkarkimit të gazit natyror të lëngshëm në terminalin e LNG-së në Portin e Damietës.
Sipas kompanisë, autoritetet egjiptiane reaguan menjëherë dhe arritën ta vinin situatën nën kontroll, ndërsa të gjitha anijet e përfshira u zhvendosën në mënyrë të sigurt jashtë zonës së portit.
ICC Shipping shtoi se aktiviteti në doke dhe terminalet e tjera të portit pritet të rifillojë gjatë natës.
Deri më tani, as Ambrey dhe as ICC Shipping nuk kanë identifikuar shkakun e shpërthimit, ndërsa autoritetet egjiptiane nuk kanë dalë ende me një reagim zyrtar për incidentin.
