Spanja pritet të bëhet destinacioni më i vizituar turistik në botë deri në vitin 2040, duke kaluar Francën, sipas një studimi të ri nga Deloitte dhe Google.
Numri i udhëtimeve turistike në mbarë botën parashikohet të rritet ndjeshëm dhe të arrijë në rreth 2.4 miliardë deri në vitin 2040. Në vitin 2025, Franca kryesoi renditjen me 102 milionë turistë ndërkombëtarë, ndërsa Spanja u rendit e dyta me 96.8 milionë vizitorë.
Parashikimet tregojnë se deri në vitin 2040 Spanja mund të arrijë në 110 milionë turistë në vit, ndërsa Franca rreth 105 milionë. SHBA-ja dhe Kina pritet të mbeten në pesëshen e parë, ndërsa Meksika mund të ngjitet në vendin e pestë dhe Italia të zbresë në të gjashtin.
Rritja e turizmit ka sjellë përfitime të mëdha ekonomike për Spanjën, por njëkohësisht ka shtuar edhe shqetësimet për mbiturizmin, veçanërisht në qytetet dhe zonat më të frekuentuara. Barcelona synon t’i japë fund apartamenteve turistike afatshkurtra deri në vitin 2028, ndërsa në ishujt Balearikë janë vendosur kufizime të reja.
Me miliona turistë të rinj që pritet të mbërrijnë në vitet e ardhshme, sfida për Spanjën do të jetë të ruajë avantazhin ekonomik të turizmit pa rënduar më tej banorët, qytetet dhe burimet lokale.
