Operacioni i drejtuar nga SPAK, që zbuloi një grup të rëndësishëm ndërkombëtar të trafikimit të kokainës, i përbërë nga shqiptarë dhe shtetas të Amerikës Latine, është i rëndësishëm për disa arsye:
Së pari, sepse sasia e kokainës që ky grup trafikonte në Shqipëri dhe më pas shpërndante në rajon dhe në BE ishte e madhe. Aktualisht, janë sekuestruar 48 tonë lëkurë gjedhi, mes të cilave ishte fshehur lënda e parë e kokainës. Sasia e lëndës së parë që pritet të zbulohet mes lekures pritet të kalojë 500 kg. Procesi i përpunimit të mëtejshëm mund të sillte tonë të tëra kokainë të formuara prej saj.
Së dyti, ky operacion nxjerr në pah sofistikimin e grupeve shqiptare dhe kapacitetin e tyre, jo vetëm për të transportuar sasi të mëdha të lëndës narkotike, por edhe për ta përpunuar atë, duke përfituar nga ekspertiza më e mirë e 'mjeshtrave' kolumbianë dhe venezuelianë. Laboratori i përpunimit në Qerek të Fushë-Krujës ishte ndërtuar në mënyrë strategjike, shumë afër aeroportit ndërkombëtar të Tiranës. Si pasojë, hetimet kanë qenë të vështira, veçanërisht monitorimi nga autoritetet me dronë, për shkak të pozicionit të tij.
Së treti, sepse grupi i identifikuar pas këtij aktiviteti kriminal sjell emra të rinj në botën e krimit, të paidentifikuar më parë. Kjo tregon se një gjeneratë e re e krimit të organizuar shqiptar po ngrihet, e cila e sheh aktivitetin kriminal si një mundësi biznesi, duke u ndihmuar nga mundësitë e reja të transportit, komunikimit dhe globalizimit në përgjithësi.
Së katërti, është inkurajuese që SPAK e ka drejtuar dhe ekzekutuar këtë operacion i vetem, dhe jo thjesht si mbështetëse të agjencive të tjera ndërkombëtare. Kjo jep shpresë se, të paktën, ka hapa pozitivë nga drejtësia në luftën kundër krimit, pavarësisht sofistikimit të tij.
Nga Fatjona Mejdini
