Nga Kastriot Dervishi
Pavarësisht se Lufta e Dytë Botërore kishte përfunduar, Brigada e 3-të komuniste vazhdonte të kontribuonte për vendosjen e pushtetit jugosllav në Kosovë. Lufta kundër shqiptarëve ishte motivi kryesor dhe pjesën më të madhe të luftimeve që brigadat nga Shqipëria zhvilluan në trojet shqiptare në Jugosllavi. Ja një pjesë e urdhëroperacionit:
“Duke marrë parasysh se ka ende grupe reaksionarësh që qarkullojnë andej e këndej për të shpëtuar kokën e tyre, duke gjetur strehë nëpër bjeshkë dhe duke u furnizuar nga katundet afër... Nga ana tjetër, ekzistenca e tyre në mal ul prestigjin e ushtrisë, dobëson pushtetin, i jep kurajë elementin të pakënaqur dhe ajo që ka rëndësi të dorës së parë, është se kurajon reaksionin për të turbulluar ujërat.
Për të gjetur e për të eliminuar këto banda reaksionarësh është e domosdoshme një lëvizje e tillë, duke kontrolluar sektorët e ndryshëm ku ndodhen forcat. Edhe lavdërimeve të mëparshme të korrura në luftë e gjakderdhje, kemi për t’i shtuar suksese të reja...Qëllim ynë:
1-Të asgjësojmë bandat që qarkullojnë nëpër këto sektorë.
2-Të shkatërrojmë bazat, në qoftë se i kanë.
3-Të presim rrugën, në rast se kërkojnë të kalojnë nëpër sektorët tanë për t’u hedhur atje ku mund të gjejnë strehim, sepse ndiqen prej forcave të brigadave të tjera.
4-Paraqitja e forcave tona, forcon pozitën politike të terrenit”.
(Pjesë nga urdhëroperacioni i datës 25 maj 1945 i Brigadës së 3-të, nënshkruar në Kaçanik nga komisari Osman Sinani dhe komandanti Saliko Sulo kundër “reaksionarëve” në Kosovë)
