Ergys Agasi, i cili bashkë me Ermal Beqirin janë shpallur në kërkim pasi dyshohen si krerë të një grupi kriminal që vepronte brenda Agjencisë Kombëtare të Shoqërisë së Informacionit, rezulton se jo vetëm kishte zyrë brenda Equos Resort, por sipas dëshmisë së biznesmenit Orest Sota, ka regjistruar në emrin e tij edhe pronat e resortit në pronësi të biznesmenit Klodjan Allajbeu.
Një fakt të tillë e pohon vetë Sota, babai i të cilit, Lefter Sota, kishte lidhur kontratë me Allajbeun për të ndërtuar vila në kompleksin Equos. Pagesat, sipas tij, do të bëheshin me klering dhe me vilat që do të ndërtoheshin. Sipas dëshmisë së tij, Agasit, me të cilin kishte miqësi, i ishte lënë një zyrë brenda Equos Resort, ambient ku më vonë do të zbuloheshin edhe shishe vere me vlerë prej mijëra eurosh.
Por ajo që, sipas dëshmisë së Orest Sotës, rezulton edhe më befasuese është fakti se pronat e Equos Resort përfunduan në emër të Ergys Agasit.
“Tek Equos Resort nuk kishte asnjë pronë. Pas kontratës së shitjes me Klodjanin nuk u bënë ndryshime në QKB me administratorin e subjektit Equos, për arsye se nuk ishin bërë pagesat dhe unë nuk mora asnjëherë administrimin e pronës. Unë nuk jam marrë me administrimin e Equos. Më pas kam mësuar se Ergysi ka kaluar pronat e Equos Resort në emër të tij. Këtë gjë e kam mësuar nga shtetasi Klodjan Allajbeu. Kur ka ndodhur ky proces unë nuk kam qenë në dijeni. Kur ka ndodhur kjo, Ergysi nuk ka folur me asnjeri, as nuk ka pyetur njeri dhe as nuk ka bërë asnjë akt noterial lidhur me këto”, ka deklaruar ndër të tjera Orest Sota.
Pronat e regjistruara në emër të Agasit janë sekuestruar nga SPAK. Nën sekuestro janë vendosur edhe pasuri të të dyshuarve të tjerë, përfshirë ish-drejtoreshën e AKSHI-t, Mirlinda Karçanaj. Agasi dhe Beqiri dyshohet se, përmes një skuadre paramilitare, rrëmbenin dhe shantazhonin biznesmenë për t’i detyruar të tërhiqeshin nga tenderat.
