Meta po provon një mënyrë të re për ta futur inteligjencën artificiale në jetën e përditshme: një pajisje të vogël të quajtur Muse Charm, e cila mund të mbahet në xhep, në çelësa apo të vendoset në çantë.
Mark Zuckerberg e prezantoi pajisjen gjatë eventit Meta Connect. Në ekranin e vogël shfaqet një personazh i animuar dhe dizajni ka bërë që pajisja të krahasohet me lodrat elektronike Tamagotchi që u bënë fenomen në fund të viteve ’90.
Por pas pamjes së lezetshme fshihet një asistent me inteligjencë artificiale. Sipas prezantimit, Muse mund të zhvillojë biseda në kohë reale, t’u përgjigjet emaileve, të rezervojë udhëtime dhe madje të kryejë porosinë javore të ushqimeve.
Meta po e pozicionon pajisjen si një lloj shoqëruesi personal me AI që mund të përdoret pa qenë nevoja të hapësh vazhdimisht telefonin. Ekspertët e cituar nga The Guardian, megjithatë, ngrenë edhe një pikë interesante: pamja e ëmbël e pajisjes mund t’i bëjë njerëzit ta perceptojnë teknologjinë si më të padëmshme dhe të ulin vigjilencën ndaj çështjeve që lidhen me privatësinë dhe të dhënat personale.
Meta synon ta nxjerrë Muse Charm në dhjetor, ndërsa Zuckerberg ka thënë se aktualisht janë prodhuar vetëm pak pajisje të tilla.
