Është shtuar numri i banorëve të lagjeve “28 Nëntori” dhe “29 Nëntori” në Vlorë që kanë kërkuar ndihmë në Spitalin Rajonal pasi kanë shfaqur të vjella dhe diarre. Pacientët kanë marrë serum dhe janë kthyer në banesat e tyre pa pasur nevojë për shtrim.
Dyshohet se rastet mund të lidhen me ujin e pijshëm. Në të dyja lagjet, furnizimi me ujë ishte rikthyer pas një ndërhyrjeje për riparimin e rrjetit të ujësjellësit.
Nga analizat e ujit, në dy mostra raportohet se është konstatuar mungesë klori, ndërsa në disa mostra të tjera parametrat kanë rezultuar brenda normave.
Shkaku i simptomave ende nuk është konfirmuar zyrtarisht. Mbetet për t’u përcaktuar nëse rastet kanë lidhje me cilësinë e ujit.
