Edi Rama ka mbrojtur sërish idenë e tij për krijimin e shtetit bektashi. Në një reagim në X, kryeministri ka shprehur keqardhje për komunitetin bektashi, që sipas tij, nuk ka hapësirat dhe mundësitë e komuniteteve të tjera.
Gjithsesi, sipas tij, nga ideja deri te jetësimi i saj ka një kohë të gjatë për të sqaruar gjithçka dhe një proces të plotë publik e legjislativ që duhet të zhvillohet, kështu që nuk ka asnjë ngut dhe asnjë nevojë për polemika të kota.
Në fakt, ide të tilla shpërthyese zakonisht Rama i bën publike afër ndonjë skandali që përfshin qeverinë e drejtuar prej tij. Një situatë e ngjashme ndodhi edhe me idenë e amnistisë fiskale, të cilën ai e mbrojti fort, edhe pse pati kundërshtime nga brenda vendit dhe nga ndërkombëtarët. Gjithsesi, një temë me karakter fetar është më e ndjeshme për publikun dhe nxit reagime të shumta dhe të ndryshme. Kjo ka çuar narrativën politike të dités drejt bektashinjve, ndërkohë që çështje të rëndësishme si korrupsioni dhe kapja e drejtësisë duket se po lihen mënjanë.
