Shtëpia e Bardhë ka lançuar një kanal të ri televiziv online që transmeton 24 orë në ditë, të quajtur “Trump TV: The Essentials Station”, në një kohë kur përplasja e administratës së Donald Trump me mediat amerikane ka hyrë në një fazë të re.
Shërbimi nisi transmetimin të hënën, më 21 shtator, në orën 19:00 sipas kohës së bregut lindor të SHBA-së. Shtëpia e Bardhë e prezanton atë si një mënyrë për të ndjekur në një vend të vetëm fjalimet, njoftimet dhe momentet kryesore të administratës Trump.
Transmetimi i parë përfshiu një fjalim të presidentit Trump në Mount Rushmore. Zëvendës-asistenti i presidentit, Kaelan Dorr, e përshkroi kanalin në rrjetin X si një transmetim të momenteve më të rëndësishme të administratës, “pa filtra”.
Lansimi i “Trump TV” vjen vetëm pak ditë pasi Trump ndaloi hyrjen në Shtëpinë e Bardhë për gazetarët e CNN, MS NOW dhe Politico. Presidenti amerikan i ka akuzuar këto media për raportime të rreme dhe negative ndaj administratës së tij.
Të hënën, të tre organizatat mediatike ngritën një padi në gjykatën federale kundër administratës Trump. CNN, MS NOW dhe Politico argumentojnë se vendimi për t’u hequr aksesin në Shtëpinë e Bardhë shkel të drejtat e tyre të garantuara nga Amendamenti i Parë dhe kërkojnë rikthimin e aksesit.
Përplasja ka prekur edhe mënyrën tradicionale të mbulimit televiziv të presidentit amerikan. Pas ndalimit të CNN-it, rrjetet e tjera të mëdha televizive vendosën të pezullojnë pjesëmarrjen në sistemin e përbashkët të transmetimit të aktiviteteve presidenciale, në vend që të zëvendësonin CNN-in në detyrat e tij.
Ky sistem, i njohur si “press pool”, mundëson që rrjetet televizive të ndajnë mes tyre pamjet e aktiviteteve të presidentit dhe t’ua shpërndajnë ato edhe organizatave të tjera mediatike. Kriza e ditëve të fundit ka bërë që disa aktivitete të Trumpit të mbulohen drejtpërdrejt nga vetë Shtëpia e Bardhë, përfshirë transmetimet e publikuara në kanalet zyrtare të administratës.
Në këtë klimë, krijimi i “Trump TV” ka shkaktuar reagime të forta nga kritikë dhe organizata të medias. Disa e kanë përshkruar shërbimin si një formë të medias së kontrolluar nga qeveria, ndërsa administrata Trump e paraqet atë si një kanal të drejtpërdrejtë për publikun, përmes të cilit mund të shihen aktivitetet dhe deklaratat e presidentit pa ndërmjetësimin e mediave tradicionale.
