- Shqipëria nën metamorfozë nga turizmi masiv
- Vendi regjistron rritjen më të madhe të numrit të vizitorëve në Europë që prej vitit 2019. Ky zhvillim po e ndryshon me shpejtësi këtë komb ende të varfër, me baza të brishta.
Bumi i turizmit në Shqipëri ka filluar para pesë vitesh, përpara pandemisë së Covid-19. Që nga ajo kohë, numri i turistëve ka shpërthyer, duke kaluar nga 5.9 milionë në vitin 2018 në 10.1 milionë në 2023, ndërkohë që vendi ka vetëm 2.8 milionë banorë. Këto shifra pritet të tejkalohen edhe në vitin 2024. Nisur nga këto statistika media franceze "Le Monde" i ka kushtuar një shkrim turizmit në vendin tonë. Sipas kësaj media ajo që sot quhet turizëm rrezikon vendin tonë të çojë drejt një metamorfozë totale. Ndaj për këtë shkrim niset me përshkrime mbi arsyet e ardhjes në Shqipëri, ekonomike dhe pikat tërheqëse. Turizmi Në bregdetin shqiptar, atmosfera është ende verore edhe pse fundi i vitit po afrohet. Në hotelin-klub “Fllad”, pushuesit po notojnë në Adriatik dhe, megjithëse mbrëmjet janë të freskëta, bari pranë pishinës shërben mojito dhe vodka me shurup shege pa limit. “Para se të vija këtu, nuk dija asgjë për këtë vend,” pranon Nancy Mignon, 39 vjeç, me pushime në “Fllad” me partnerin dhe një çift miqsh. “Agjencia e udhëtimeve na tha: ‘Shqipëria është diçka e re, e bukur dhe e lirë. Kështu që vendosëm t'a provonim,’- shpjegon ajo, një edukatore në një kopsht fëmijësh që jeton pranë Charleroi, në Belgjikë.
Një grup i vogël pushuesish është i befasuar, ashtu si të gjithë ata që takohen në këtë klub, i mbushur nga operatori turistik FRAM. Atmosfera mesdhetare, plazhi, vizitat në Tiranë apo në zonat historike të Gjirokastrës dhe Beratit... Dhe hoteli i sapondërtuar, me dhomat e tij të mëdha dhe pllakat që shkëlqejnë – megjithëse zonat përreth tij, të mbushura me ndërtime të shumta, nuk ofrojnë shumë interes. “Kemi hapur dy klube këtë vit në vend dhe kemi dërguar 6,000 njerëz: ka tejkaluar të gjitha pritshmëritë tona,” thotë François Perrin, përgjegjës për Shqipërinë te FRAM. “Sapo kemi nënshkruar për një të tretë për vitin 2025.”
Një nga arsyet e këtij suksesi janë çmimet e ulëta në këtë vend, që është një nga më të varfrit në Europë. Në “Fllad”, klientët, pothuajse të gjithë francezë, kanë paguar, për pushimet e tyre në fund të tetorit, mes 500 dhe 600 euro për një javë për person, duke përfshirë qëndrimin e plotë dhe fluturimin nga Franca. “Është shumë më lirë se Greqia apo Kroacia,” konstaton Franck Legrain, 51 vjeç, i ardhur me pushime me partneren e tij. “Dhe na dha mundësinë të zbulojmë një kulturë dhe histori për të cilën nuk kishim asnjë ide,” shton ai, një drejtor komercial në një ndërmarrje të vogël, që jeton në Gard. Formula të tjera po aq ekonomike Vanessa Lefranc, krijuese llambash nga Fontenay-sous-Bois (Val-de-Marne), llogarit se ka shpenzuar “rreth 1,000 euro” (pa përfshirë fluturimin) për javën e fundit të tetorit, për veten dhe fëmijët e saj 16 dhe 19 vjeç. Në këtë vend të madh sa Bretanja, familja ka udhëtuar me makinë me qira dhe ka qëndruar në hotele apo në dhoma të rezervuara përmes platformave si Booking apo Airbnb. Një udhëtim “jashtëzakonisht relaksues” midis plazheve, liqeneve dhe maleve, të cilin adoleshentët e saj “e adhuruan.” “Gjithmonë ndiheshim larg turmës, përveç disa vendeve, si Syri i Kaltër,” rrëfen ajo. “Kemi përshtypjen se po zbulojmë Shqipërinë në momentin e duhur, para se të mbërrijë turizmi masiv,” vijon z. Legrain. Investimet Disa të rinj shqiptarë, që ishin larguar jashtë vendit, e shohin megjithatë në rritjen e sektorit një mundësi për t’u kthyer. « Ky vend është një lloj Edeni për turizmin. Çdo gjë është e mundur! Është magjepsëse të shohësh se si ishim një destinacion i panjohur dhe, papritur, shumë njerëz po dëgjojnë për ne », gëzohet Eriglent Kallollari, 34 vjeç. Pas largimit në Itali, ky i diplomuar në menaxhim u kthye në vitin 2019 për të themeluar një shoqëri të specializuar në menaxhimin e hoteleve. « Po arrijmë një rritje prej 20 deri në 25% në vit », shpjegon ai nga Eurostar, një prej hoteleve të tij, në qendër të Tiranës. Kombi i shkrimtarit Ismail Kadare renditet kështu, sipas një studimi të OKB-së për Turizmin, si vendi evropian me rritjen më të madhe të numrit të turistëve në pesë vitet e fundit. Një tronditje e vërtetë për këtë territor kryesisht bujqësor, që prej kohësh ishte i lidhur me varfërinë dhe krimin e organizuar. Për qeverinë, turizmi është me të vërtetë një levë qendrore zhvillimi, për të përshpejtuar rrugën e saj drejt Brukselit. Një rrugë ende e gjatë, në këtë vend në zhvillim, por ende të varfër, i shënuar nga dobësia e shërbimeve publike dhe brishtësia e institucioneve të tij demokratike.
Burimi:https://www.lemonde.fr/economie/article/2024/11/19/l-albanie-metamorphosee-par-l-explosion-du-tourisme-low-cost_6401951_3234.html
