Enea Themollari është 26-vjecari që mbeti i plagosur aksidentalisht nga shpërthimi i një sasie tritoli në hyrjen e apartamentit të fqinjit në pallatin ku ai jetonte në Elbasan. Ai është trasportuar në spital ku po mbahet në trajtim intensiv, pasi ka dëmtime në kokë për shkak se nga shpërthimi është shkëputur dera e banesës së komshiut të tij dhe e ka zënë poshtë.
Ngjarja e rëndë u regjistrua në orët e para të mëngjesit të ditës së sotme në lagjen “Haxhias”, në Elbasan ku në katin e 4 të një pallati shpërtheu një sasi tritoli.
Në apartament banonin dy motra nga Lezha. Njëra nga motrat i tha policisë se ka dy vite që jeton në këtë apartament pasi qiraja është më e ulët se në Tiranë. Vajza tha se merret me mirëmbajtjen e faqeve të ndryshme ne rrjetet sociale. Motra tjetër sipas policisë kishte shkuar në Elbasan së fundmi dhe jetonin në të njëjtin apartament.
Policia është duke hetuar për të identifikuar shënjestren e atentatit me eksploziv.
Themollari përjashtohet të jetë target i sulmit, për shkak se ai është plagosur aksidentalisht.
Në lidhje me dy motrat, policia ka dyshime të forta, që mund të kenë qenë objekt i sulmit, por ata të dyja kanë mohuar të kenë konflikte apo probleme me ndonjë person.
Grupi hetimor ka dyshime të forta se në shënjestër mund të ketë qenë pronari i apartamentit Besnik Braka njohur edhe me emrin Nik Vojaçek, e po ashtu po heton lidhjen dhe njohjen e dy motrave me të.
59-vjecari është një emër shumë i njohur i botës së krimit në Elbasan. Ai është ekstraduar në 2013 nga Gjermania drejt Shqipërisë për shkak se me vendimin e datës 12.01.2009, gjykata për Krime të Rënda e ka dënuar me 14 vjet burg për kryerjen e veprave penale të “trafikim armësh dhe municionesh”, “prodhim e shitje narkotikësh”, “prodhimit dhe mbajtje pa leje e armëve luftarake”, si dhe “falsifikimit të dokumenteve”. Në 2013 ai u dënua edhe për akuzën e korrupsionit aktiv të gjyqtarëve.
