Kur Tirana zien nga lajmi se SPAK ka firmosur urdhër-arreste të reja për aferën e inceneratorit të Tiranës, një aferë që ka përlarë miliona euro nga taksat e kryeqytetasve dhe incenertatori nuk ekziston, institucioni i shumëpërfolur i drejtësisë në vend, nuk ka bërë ende asnjë reagim zyrtar në lidhje me këtë çështje sensitive.
Ajo që dihet deri më tani është se nga 8 urdhër arreste me burg të miratuara nga Gjykata e Posacme, asnjë prej të dyshuarve nuk është arrestuar, pasi rezultojnë se ndodhen jashtë vendit.
Në kërkim janë shpallur, Denisa Tollkuci, Dashamir Ymeraj, Ilir Dedja, Endrit Habilaj dhe Renardo Nallbani.
Policia ka ushtruar kontroll në banesat e këtyre personave, por vetëm kaq.
Po cilët janë 5 shqiptarët që tashmë kërkohen nga policia dhe cili është roli i tyre në këtë aferë?
Tollkuci, rezulton të jetë administratore e kompanisë ‘Integrated Technology Services’, e Klodian Zotos, emëruar më 11 qershor 2020.
Dashamir Ymeraj, rezulton i përfshirë në një skemë evazioni fiskal dhe ka qenë në marrëdhënie financiare me kompaninë ITS të Klodian Zoto.
Ymeraj është administrator i kompanive Elvis – Coo, Elvis 03 Grup, Elvis Coo dhe Elvis 03.
Ilir Dedja, është ish -ortak biznesi me Mirel Mërtirin, një prej dy pronarëve faktikë të inceneratorit të Tiranës, njëherazi garantor i kontratës së qirasë së apartamentit ku po qëndron ish-zv.kryeministri Arben Ahmetaj në Lugano të Zvicrës.
Endrit Habilaj, është me profesion gazetar dhe ka transaksione me Mirel Mërtirin e Klodian Zoton me disa kompani në emër të tij. Nallbani nga ana tjetër, rezulton të jetë i implikuar të marrëveshja e depozitimit të dherave në landfillin e Sharrës.
Ndaj tyre rëndojnë dyshimet për pastrim parash dhe grup criminal.
Përtej këtyre 5 emrave dhe 3 të huajve të shpallur në kërkim, pyetja e madhe është: a ka urdhra të tjerë të firmosur nga SPAK? Nëse po, për kë janë firmosur këto urdhra? A ka zyrtarë të lartë të Bashkisë së Tiranës për të cilët është firmosur një masë? Cfarë ka të vërtetë lidhur me lajmin që qarkulloi në disa media online pak javë më parë lidhur me bllokimin e pasaportës së kryebashkiakut të Tiranës Erjon Veliaj?
A ka SPAK një hetim për dekonspirim lidhur me këtë hetim që ka shkaktuar përplasje politike, por edhe një zemërim në mbarë opinionin publik.
SPAK duhet tu japë përgjigje këtyre pyetjeve dhe jo vetëm. Inceneratori i Tiranës është “basti” i madh dhe testi më i rëndësishëm për Prokurorisë së Posacme për të dëshmuar pavarësinë e saj nga Edi Rama e maxhoranca./VNA.al/
