Një shpërthim i fuqishëm ka tronditur fshatin Rrilë të Lezhës në orët e para të mëngjesit të kësaj të shtune. Rreth orës 03:00, një sasi lënde plasëse është vendosur dhe ka shpërthyer në derën e një banese dykatëshe.
Sipas të dhënave paraprake, banesa ku ndodhi shpërthimi është në pronësi të shtetasit Mirash Mirashi.
Mësohet se në momentin e shpërthimit, çifti i bashkëshortëve ndodhej brenda banesës. Fatmirësisht, nga ky incident nuk janë shënuar persona të lënduar, ndërsa janë shkaktuar dëme të konsiderueshme materiale.
Menjëherë pas ngjarjes, forca të shumta policie mbërritën në vendin e ngjarjes dhe nisën veprimet hetimore për identifikimin dhe kapjen e autorëve, si dhe për zbardhjen e plotë të motiveve të këtij sulmi me eksploziv.
Grupi hetimor po vijon punën për dokumentimin e plotë ligjor të ngjarjes, ndërsa pritet që në vijim të ketë më shumë detaje lidhur me rastin.
