Violand Braçellari, autori i vrasjes së efektivit të Forcave Shqiponja, Enea Meçollari, dhe plagosjes së kolegut të tij Edison Adri gjatë operacionit të 4 qershorit në Maliq, rezulton të ketë përfituar fonde publike për bujqësinë dhe blegtorinë, ndonëse ishte në kërkim prej vitesh.
Burime të sigurta pranë familjarëve të Braçellarit bëjnë me dije se 43-vjeçari ka përfituar subvencione për ngritjen e stallave të bagëtive nëpërmjet AZHBR-së. Ende nuk është e qartë nëse fondet janë përfituar në emër të tij apo në emër të nënës së tij, por burimet konfirmojnë se ai ka qenë përfitues i skemave mbështetëse të shtetit.
Rasti ngre pikëpyetje serioze mbi mënyrën e verifikimit të përfituesve të fondeve publike. Braçellari konsiderohej person me rrezikshmëri të lartë shoqërore dhe për kapjen e tij, ndër vite, ishin angazhuar edhe forcat speciale RENEA.
Operacioni për arrestimin e tij u zhvillua një ditë më parë në një zonë malore të Maliqit, ku ai fshihej në një stan. Gjatë shkëmbimit të zjarrit mbeti i vrarë efektivi Enea Meçollari, ndërsa u plagos Edison Adri. I plagosur mbeti edhe vetë Braçellari.
