Gazetarja Klodiana Lala ka deklaruar se zhvillimet e fundit në hetimet e SPAK ndaj ish-zv/kryeministres Belinda Balluku kanë ndryshuar ndjeshëm situatën e saj ligjore dhe kanë rënduar pozitat e saj në raport me drejtësinë. Sipas saj, me ngritjen e akuzave të reja për korrupsion dhe pastrim parash, çështja ka hyrë në një fazë krejt tjetër dhe me një rrezik më të lartë dënimi.
Lala u shpreh se pritet të shihet edhe hapi i radhës i Prokurorisë së Posaçme, përfshirë mundësinë e një kërkese të re lidhur me masat e sigurisë, siç mund të jetë edhe heqja e imunitetit apo kërkesa për arrestim. Ajo kujtoi se më herët, sipas saj, mazhoranca dhe kryeministri Edi Rama kishin bllokuar procedurat me argumentin se ndaj Ballukut nuk kishte akuza për korrupsion, ndërsa tani situata ka ndryshuar me përfshirjen e këtyre veprave penale.
Sipas gazetares, kjo përbën një ndryshim të rëndësishëm në hetime dhe rrëzon, siç u shpreh ajo, edhe qëndrimet e mëparshme të mazhorancës në Kuvend. Lala theksoi se “Balluku është në një raport të ri me drejtësinë”, duke shtuar se veprat penale të korrupsionit dhe pastrimit të parave parashikojnë një marzh më të lartë dënimi dhe e rëndojnë më tej pozitën e saj procedurale.
Ajo shtoi gjithashtu se SPAK po vijon hetimet edhe për persona të tjerë të përfshirë në çështje, ndërsa theksoi se zgjatja e hetimeve lidhet edhe me afatet procedurale që, sipas saj, kanë lejuar më shumë kohë për grumbullimin e provave. Lala tha se në këtë fazë ka një “ndryshim drastik” të situatës dhe se hetimet po thellohen.
Në të njëjtën intervistë, Klodiana Lala foli edhe për ish-futbollistin Igli Tare, i cili sipas saj po hetohet në lidhje me një vilë në Dhërmi. Ajo deklaroi se Tare pretendon se vila është blerë në vitin 2018 me të ardhura të ligjshme nga aktiviteti i tij në sport, ndërsa SPAK dyshon se pasuria është e fshehur dhe e lidhur me ish-zyrtaren Belinda Balluku. Sipas saj, vila ndodhet nën administrimin e Agjencisë së Pasurive të Sekuestruara.
Lala shtoi se hetimet kanë përfshirë një gamë të gjerë veprimesh hetimore, përfshirë marrjen në pyetje të personave të ndryshëm të lidhur me vilën, nga punonjësit e mirëmbajtjes deri te shoferët dhe zyrtarët pranë Ballukut. Ajo tha se janë analizuar edhe qelizat telefonike, të cilat sipas saj kanë ndihmuar hetuesit të gjurmojnë lëvizjet dhe kontaktet e personave të përfshirë.
Sipas saj, SPAK ka verifikuar komunikimet dhe lëvizjet e tyre në lidhje me vilën në Dhërmi, duke i lidhur ato me dëshmitë dhe të dhënat telefonike. Lala përfundoi duke theksuar se, sipas saj, pozitat e ish-zv/kryeministres janë më të rënduara se më parë dhe se ajo rrezikon një dënim më të lartë nëse akuzat e reja konfirmohen.
