Efektivi i plagosur në ngjarjen e Maliqit, Edison Adri, i është nënshtruar një ndërhyrjeje kirurgjikale në nofull. Sipas informacioneve të para, gjendja e 36-vjeçarit raportohet e stabilizuar dhe nën kujdesin e mjekëve.
Ndërkohë, Violand Braçellari, autori i dyshuar i vrasjes së efektivit Enea Mekolli, ndodhet jashtë rrezikut për jetën, por do të vijojë të marrë trajtim mjekësor në Spitalin e Traumës. Mjekët po monitorojnë gjendjen e tij shëndetësore, ndërsa ai mbahet nën mbikëqyrje.
Në zhvillim të hetimeve, nëna e Violand Braçellarit është shoqëruar nga forcat e policisë dhe është marrë në pyetje në ambientet e Drejtorisë Vendore të Policisë Korçë nga grupi hetimor, në kuadër të sqarimit të plotë të rrethanave të ngjarjes.
