Detaje të reja dalin nga aksioni i policisë në Lozhan të Maliqit, ku Violand Braçellari vrau efektivin e policisë Enea Mekolli dhe plagosi një tjetër punonjës policie, teksa forcat “Shqiponja” po përpiqeshin ta arrestonin.
Sipas informacioneve paraprake, Braçellari kishte ndërtuar stane në malin e Bodes me fonde të AZHBR-së. Një prej çobanëve e kishte denoncuar në polici një natë para aksionit, pasi pretendonte se Braçellari nuk e kishte paguar për punën e kryer.
Pas kallëzimit, policia hartoi planin operacional për arrestimin e tij, por ndërhyrja përfundoi tragjikisht me vrasjen e Enea Mekollit dhe plagosjen e efektivit Edison Adri.
Më pas, i shumëkërkuari Braçellari u plagos gjatë shkëmbimit të zjarrit me policinë dhe u vu në pranga. Ai është ish-ushtarak dhe forcat RENEA kishin dështuar disa herë më parë për ta arrestuar.
