Shoqatat e gjyqtarëve refuzojnë takimin me kryeministrin Edi Rama për problematikën e krijuar me pagat.
Përmes shkresave zyrtare, Shoqata Kombëtare e Gjyqtarëve dhe Unioni i Gjyqtarëve i kanë komunikuar z. Rama se nuk do të uken në tryezë me të, derisa Gjykata Kushtetuese të shprehet lidhur me kërkesën e tyre, ku kanë atakuar ligjin e miratuar nga maxhoranca për çështjen e pagave.
“Deri në një vemdimmarrje të Gjykatës Kushtetuese lidhur me padinë e paraqitur nga shoqatat e magjistratëve, është e pamundur për ne pjesëmarrja në tryezën e konsultimit të datës 28 shtator 2026, pa e konsideruar këtë mospjesëmarrje si një mbyllje të dialogut institucional”, thuhet në shkresë.
Takimin e refuzoi edhe Shoqata e Prokurorëve, e cila po ashtu thotë se dialogu duhet të zhvillohet në një kuadër të qartë ligjor, duke respektuar rolin dhe kompetencat e Gjykatës Kushtetuese.
“Shoqata e Prokurorëve e konsideron dialogun institucional një instrument të rëndësishëm për adresimin e këtyre çështjeve dhe mbetet e hapur për një komunikim konstruktiv me institucionet.
Megjithatë, duke pasur parasysh se çështja objekt i konsultimit lidhet drejtpërdrejt me një proces kushtetues të iniciuar nga shoqatat e magjistratëve pranë Gjykatës Kushtetuese, do ta vlerësonim që një tryezë e tillë të zhvillohej pas një qëndrimi të Gjykatës Kushtetuese mbi çështjen, në mënyrë që dialogu institucional të zhvillohet mbi një kuadër më të qartë dhe duke respektuar plotësisht rolin dhe kompetencat kushtetuese të Gjykatës.
Gjithashtu, për ta bërë dialogun sa më konkret dhe efektiv, do ta vlerësonim që një takim i ardhshëm të organizohej mbi bazën e një agjendeje paraprake, së bashku me një draft ose pika konkrete diskutimi, si dhe me përcaktimin paraprak të modaliteteve dhe formatit të tryezës, në mënyrë që pjesëmarrësit të kenë mundësi të përgatiten dhe diskutimi të prodhojë rezultate konkrete”, thuhet në shkresën e Shoqatës së Prokurorëve.
Kryeministri kërkoi takim me njerëzit e drejtësisë, për ahkak të ngërcit të krijuar me pagat. Pas përplasjeve për vendimin e Gjykatës Kushtetuese, që vonesa në zbatim çoi në bllokimin e pagave, gjyqtarët kallëzuan Petrit Malajn, Ministër i Financave. Më pas, gjyqtarët vunë në lëvizje Kushtetuesen, ku atakuan ligjin që miratoi maxhoranca për pagat, duke iu bërë një rritje prej 2 për qind, çka sipas tyre bie ndesh me vendimin e mëparshëm të GJK-së.
