Dy ngjarje të rënda janë regjistruar mëngjesin e sotëm në Maliq, brenda një harku kohor prej rreth 20 minutash.
Rreth orës 06:50, në banesën e një 74-vjeçari, në fshatin Pojan, ka shpërthyer një bombol gazi. Si pasojë e shpërthimit, i moshuari, me inicialet Th. K., ka pësuar djegie në fytyrë dhe është transportuar në spital, ku po merr ndihmë mjekësore. Sipas informacioneve paraprake, ai ndodhet jashtë rrezikut për jetën.
Vetëm pak minuta më vonë, rreth orës 07:10, një tjetër ngjarje e rëndë është regjistruar në lagjen “Krastafilak” në qytetin e Maliqit.
44-vjeçari me inicialet I. K. ishte duke ngarkuar disa sende në automjetin e tij, kur makina ka lëvizur pasi nuk ishte siguruar me frenën e dorës. Automjeti e ka zënë poshtë 44-vjeçarin, duke i shkaktuar vdekjen.
Për të dyja ngjarjet janë ngritur grupet hetimore, ndërsa vijojnë veprimet për dokumentimin e plotë të rrethanave dhe shkaqeve të tyre.
