Pas deklaratës së Arlind Qorit, edhe kryetari i partisë “Mundësia”, Agron Shehaj, ka pranuar publikisht angazhimin e forcës së tij politike në protestat kundër projekteve turistike dhe konflikteve të pronësisë në disa zona të vendit, përfshirë edhe Zvërnecin.
I ftuar në emisionin “Të Paekspozuarit” në MCN TV, Shehaj deklaroi se partia që ai drejton ka qenë pranë protestuesve “nga Thethi në Rrjoll, Pogradec dhe Zvërnec”, duke e konsideruar situatën si pasojë të mënyrës se si, sipas tij, qeveria menaxhon pronat publike dhe private.
Shehaj tha se “Mundësia” po përballet edhe me pasoja ligjore për mbështetjen e protestave, duke deklaruar se është paditur në gjykatë nga biznesmeni Bashkim Ulaj për përfshirjen e partisë së tij në mbështetje të banorëve që kundërshtojnë projektin në Rrjoll.
Deklarata e Shehajt vjen në një moment kur protesta e Zvërnecit është paraqitur kryesisht si një lëvizje qytetare. Megjithatë, pas Arlind Qorit, edhe kreu i “Mundësisë” konfirmon se forca e tij politike ka qenë e angazhuar në terren dhe në mbështetjen e protestave, duke e bërë më të dukshëm rolin e partive politike në këtë mobilizim.
