Kryetari i “Lëvizja Bashkë”, Arlind Qori, ka pranuar publikisht angazhimin e forcës së tij politike në organizimin dhe mbështetjen e protestave kundër projektit turistik në Zvërnec, duke hedhur poshtë pretendimet se protestat po zhvillohen pa një përfshirje të drejtpërdrejtë politike.
I ftuar në emisionin “Të Paekspozuarit” në MCN TV, Qori deklaroi se ai dhe aktivistët e “Lëvizja Bashkë” kanë qenë të pranishëm që në ditën e parë të përplasjeve në Zvërnec, si edhe në protestat e zhvilluara më pas në Tiranë. Sipas tij, lëvizja që ai drejton ka qenë pjesë aktive e mobilizimit kundër asaj që e konsideron një proces shpronësimi të qytetarëve dhe privatizimi të hapësirave publike.
Qori akuzoi mediat kryesore për censurë, duke thënë se ngjarjet në Zvërnec janë injoruar pavarësisht përmasave që kanë marrë. Ai pretendoi se vetëm pas reagimeve të fundit të kryeministrit Edi Rama, mediat kanë filluar t’i kushtojnë më shumë vëmendje zhvillimeve.
Duke iu referuar rrethimit të zonës me tela me gjemba, kreu i “Lëvizja Bashkë” tha se kjo është një shenjë simbolike e “zhveshjes së qytetarëve nga prona e tyre”, ndërsa përmendi rastet e banorëve që, sipas tij, janë detyruar të kalojnë nga deti për të hyrë në tokat e tyre.
Në deklaratën e tij, Qori e cilësoi lëvizjen kundër projektit në Zvërnec si një reagim ndaj asaj që ai e quajti “dhunë fizike dhe strukturore”, duke paralajmëruar se protestat do të vazhdojnë edhe në ditët në vijim. Ai shkoi edhe më tej, duke e cilësuar mobilizimin aktual si “protestën më të bukur që ka ndodhur në Shqipëri në 25 vitet e fundit”, madje më të madhe se protesta e studentëve.
