Kryeministri Edi Rama reagoi sërish ndaj kundërshtarëve të investimit të planifikuar në Zvërnec, duke deklaruar se nuk ka ende një projekt për t’u anuluar, pasi ai ndodhet ende në fazën e hartimit nga disa prej studiove më të njohura arkitekturore në botë.
“Nuk ka projekt. E dini pse nuk ka projekt? Sepse projekti po punohet nga pesë studio ndër më prestigjiozet në botë”, shkruan Rama, duke përmendur studiot e arkitektëve Kengo Kuma nga Japonia, Bjarke Ingels nga Danimarka, Jean Nouvel nga Franca, Emre Arolat nga Turqia dhe K-Studio nga Greqia.
Sipas tij, projekti do të prezantohet publikisht sapo të përfundojë dhe vetëm atëherë mund të zhvillohet një debat mbi përmbajtjen e tij. “Më vjen keq, po s’kemi projekt për të anuluar”, thekson Rama.
Kryeministri hodhi poshtë edhe pretendimet se zona e Zvërnecit po i dorëzohet Izraelit apo se do të shndërrohet në një vendstrehim për palestinezët, duke i cilësuar këto pretendime si manipulime që po përdoren për të nxitur kundërshtimin ndaj investimit.
Në reagimin e tij, Rama vuri theksin te përmasat ekonomike të projektit, duke deklaruar se bëhet fjalë për një investim prej rreth 4 miliardë eurosh. Ai tha se në projekt janë të përfshirë investitorë amerikanë dhe partnerë nga Katari, përfshirë grupin Power Holding, të cilin e cilësoi si një nga konglomeratet më të mëdha në rajon.
Kryeministri akuzoi kundërshtarët e projektit se po përdorin shpifje dhe manipulime për të penguar investimet e mëdha në Shqipëri. Sipas tij, pas kësaj fushate qëndrojnë interesa të ndryshme që nuk duan zhvillimin e vendit dhe që synojnë të dëmtojnë imazhin e Shqipërisë si destinacion turistik dhe investimesh.
“E vërteta vonon, por nuk harron dhe gënjeshtrat tuaja kanë nisur që sot t’i nxjerrin këmbët e shkurtra”, përfundon reagimin e tij Rama.
