Mijëra qytetarë u derdhën sot në Sheshin Skënderbej kundër projektit të Zvërnecit, ndërsa parullat kryesore ishin kundër qeverisë, pa kursyer edhe opozitën.
Me një ndalesë të shkurtër para Ministrisë së Brendshme, turma u ndal më gjatë përballë Kryeministrisë. Kryefjala e çdo aktivisti që foli ishte largimi i qeverisë, por edhe thirrjet “Rama në burg, Berisha në burg”, që shoqëruan fjalët e tyre. Ndryshe nga protesta të tjera, në perimetrin e Kryeministrisë nuk u vu re prani e forcave të policisë për ruajtjen e godinës, ndërsa protesta u zhvillua pa incidente.
Në podiumin e organizuar u ngjitën qytetarë dhe aktivistë. Mes tyre dominuan ata të Arlind Qorrit dhe Lëvizjes Bashkë. Krahas kundërshtimit të projektit në Zvërnec, fjalën e morën edhe qytetarë dhe aktivistë që kundërshtojnë projektet e zhvillimit në Rrjoll dhe në Durrës, duke i dhënë protestës një shtrirje më të gjerë sesa vetëm kauza e Nartës.
Protesta e sotme dukej e kuruar me kujdes nga ana organizative, ndonëse nuk kishte (ende) një kokë drejtuese. Disa nga folësit dhanë variante të ndryshme për vijimin e protestës, ndonëse me gjasë ajo do të vijojë edhe nesër. Në këtë kuptim, protesta e Zvërnecit duket se po shndërrohet gradualisht në një pikë takimi për kundërshtime të ndryshme ndaj projekteve turistike dhe politikave të qeverisë.
