Sali Berisha ka konfirmuar për mediat se do të paraqitet në SPAK, duke respektuar vendimin e Gjykatës së Posaçme të Apelit. Megjithatë, ai nuk i kurseu akuzat dhe fyerjet ndaj kreut të SPAK:
“Unë e kam bërë të qartë që, gjersa është një proces që buron nga Parlamenti, do paraqitem. Unë s’kam kërkuar asgjë tjetër, vetëm Parlamentin. Nuk kam nevojë. Sepse Parlamenti ka dhënë një autorizim për arrestimin tim. Pastaj, se çfarë bëjnë këta me njëri-tjetrin, bëhen bashkë Irena me 5 mbiemra dhe Dumani me 4 banesa, dhe thonë ‘na i përmend Sali Berisha’. Jo vetëm që do ua përmend, sepse janë vjedhje 100%,” deklaroi Berisha.
Kryetari i Partisë Demokratike e bëri këtë deklaratë gjatë një konference për shtyp, ku theksoi gjithashtu se partia që ai drejton është gati për të garuar në zgjedhjet e 11 majit kundër Partisë Socialiste.
“Motorrët janë të ndezur, por nga ana tjetër ka edhe nga ata që po marrin energjinë e nevojshme për sulm. Nuk është se jam vetëm unë në punë; komunikohet në shumë forma dhe angazhimi është shumë serioz,” shtoi Berisha para gazetarëve.
