Pas disa orësh qetësie, rreth orës 18:00 janë rikthyer përplasjet mes protestuesve dhe policisë, në ditën e shtatë të protestës në Tiranë.
Përplasjet kanë nisur në bulevardin “Dëshmorët e Kombit”, ku protestuesit kanë sulmuar forcat e policisë, duke sjellë reagimin e uniformave blu. Për të shpërndarë turmën, policia ka përdorur gaz lotsjellës dhe ka qëlluar me plumba gome.
Pas ndërhyrjes së policisë, protestuesit janë zhvendosur drejt Rrugës së Dibrës, ku kanë djegur kosha mbeturinash dhe i kanë vendosur në mes të rrugës për të penguar lëvizjen e forcave të rendit.
Policia ka ndërhyrë sërish me gaz lotsjellës dhe ka shoqëruar disa protestues në Rrugën e Dibrës. Situata vijon të mbetet e tensionuar, ndërsa përplasjet mes protestuesve dhe uniformave blu vazhdojnë.
