Kryeministri Edi Rama, gjatë konferencës së fundvitit me gazetarët, ka kritikuar ashpër qeveritë e kaluara për problemet e sistemit të pensioneve, duke theksuar se reforma aktuale synon të zbusë padrejtësitë historike që janë krijuar në vite.
Rama akuzoi drejtuesit e mëparshëm për kolapsin e sistemit dhe për padrejtësinë mes pensionistëve që kanë dalë në pension para dhe pas vitit 2014. “Ajo që ka bërë Sudja, Xhaferri dhe Saliu nuk do të jetë më e rënda që shqiptarët kanë parë. Ata që vuajnë këtë shëmti politike duhet të mos ua falin kurrë shkaktarëve. Nëse duan adresën e shkaktarëve, jam i gatshëm t’ua jap, por e dinë vetë,” tha Rama.
Ai theksoi se reforma që po ndërmerret është e domosdoshme për të adresuar një situatë që, sipas tij, është krahasuar me piramidat e viteve ’90. “Nga pikëpamja e brutalitetit të dritëshkurtësisë, është shumë e ngjashme me atë që është bërë me piramidat, por me efekt në kohë për të gjithë ‘viktimat,’” shtoi Kryeministri.
Rruga e Arbrit: Tuneli i Murrizit drejt përfundimit
Kreu i qeverisë gjithashtu raportoi mbi ecurinë e punimeve në Rrugën e Arbrit, duke u ndalur te sfidat e hasura në tunelin e Murrizit. Rama tha se gjeologjia e papritur ka krijuar vonesa të mëdha, por vuri në dukje se puna po vazhdon intensivisht dhe automjetet pritet të kalojnë në pranverë.
“Tuneli i Murrizit është një pikë kyçe ku na ka goditur fort ‘syri i keq.’ Aty po bëhet një punë kolosale për të përballuar një gjeologji që solli surpriza të hidhura. E gjithë kjo po realizohet pa asnjë qindarkë shtesë nga buxheti, sepse është projekt PPP. Kur PPP bëhet siç duhet, barra ndahet,” deklaroi Rama.
Ai përfundoi duke shprehur shpresën për përfundimin e punimeve në afat, por nuk e fshehu kompleksitetin e situatës. “Shpresoj që në pranverë të hapet edhe ky tunel,” tha ai.
