Sali Berisha ka paralajmëruar se pas largimit të Erion Veliajt nga Bashkia e Tiranës, ai do të zëvendësohet nga Blendi Gonxhe. Në një takim me demokratët e Kamzës, kreu demokrat foli për akuzat ndaj kryetarit të Bashkisë së Tiranës, duke marrë meritat se për inceneratorin e Tiranës denoncimet kanë ardhur nga PD.
Sali Berisha nuk la jashtë vëmendjes as akuzat ndaj SPAK. Sipas tij, Prokuroria e Posaçme nuk po heton si duhet dhe po amniston korrupsionin e Veliajt në çështjen e inceneratorit dhe skemën e 5 drejtorëve të bashkisë.
Më herët, kryetari i Bashkisë së Tiranës iu përgjigj kreut demokrat me një gjuhë të ashpër pas akuzave se ishte larguar nga Shqipëria për të mos u kthyer më. Vetë Berisha nuk e kurseu Veliajn, duke i përmendur shpenzimet marramendëse të bashkëshortes së tij për fustane, në shifra që ai tha se shkojnë në 200 mijë euro.
