Kryeministri Edi Rama, gjatë konferencës së fundvitit, vlerësoi çeljen e negociatave për anëtarësimin e Shqipërisë në Bashkimin Europian si arritjen më domethënëse të vitit 2024. Ai nënvizoi rëndësinë e punës së administratës shqiptare, duke theksuar rolin e qindra punonjësve në procesin screening në të gjitha fushat.
“Ky proces i jashtëzakonshëm për nga volumi, intensiteti dhe cilësia do të ishte i pamundur pa skuadrën kombëtare që ka bërë një punë të shkëlqyer. Administrata jonë nuk mund të përfaqësohet nga raste të izoluara që nuk e nderojnë shtetin dhe flamurin tonë,” tha Rama.
Sipas tij, vlerësimet pozitive nga Komisioni Europian dhe qeveritë skeptike të BE-së janë dëshmi e progresit të arritur nga Shqipëria, duke e pozicionuar vendin me një tjetër imazh në sytë e Europës.
Kryeministri gjithashtu zbuloi se Shqipëria do të mirëpresë samitin e NATO-s në vitin 2027, ku do të marrë pjesë edhe presidenti i zgjedhur i SHBA, Donald Trump. Rama theksoi se ky organizim është fryt i përparimeve infrastrukturore dhe pozicionimit të Shqipërisë si partner i barabartë në arenën ndërkombëtare.
“Vlerësimet e ekipeve të NATO-s për infrastrukturën tonë janë një tregues i nivelit që kemi arritur. Ky samit është një tjetër dëshmi e respektit që Shqipëria gëzon sot, një respekt që nuk e kemi pasur kurrë më parë,” deklaroi ai.
