Kryeministri Edi Rama foli sot në prezantimin e Albanian Digital Solution Sh.A., një kompani e re shtetërore që sipas qeverisë synon të modernizojë më tej shërbimet publike dhe të forcojë inovacionin teknologjik në vend. Gjatë fjalës së tij, Rama e cilësoi AKSHI-n si një “histori të jashtëzakonshme suksesi”, duke kujtuar rrugëtimin nga një grusht shërbimesh elektronike deri te mbi 1200 shërbime online dhe më shumë se 3 milionë përdorues të platformës e-Albania.
Sipas Kryeministrit, krijimi i kompanisë së re erdhi si nevojë për të ndarë funksionet strategjike të qeverisjes elektronike nga ato operacionale, duke garantuar që institucionet shtetërore të mos mbeten peng i kompanive private për mirëmbajtjen e sistemeve të tyre. Rama foli për standarde, kontroll cilësie, përgjegjshmëri institucionale dhe vazhdimësi teknike, duke e paraqitur nismën si hapin e radhës të revolucionit dixhital shqiptar.
Megjithatë, fjalimi për suksesin e AKSHI-t vjen në një moment kur vetë institucioni ndodhet në qendër të një prej hetimeve më të mëdha të SPAK-ut. Ish-drejtoresha e Përgjithshme e AKSHI-t, Mirlinda Karçanaj, është marrë e pandehur nga Prokuroria e Posaçme për veprat penale të “Shkeljes së barazisë së pjesëmarrësve në tendera” në kuadër të një grupi të strukturuar kriminal, si edhe për “Grup të strukturuar kriminal” dhe “Kryerje të veprave penale nga grupi i strukturuar kriminal”. Në të njëjtën dosje janë përfshirë edhe ish-zyrtarë të tjerë të institucionit dhe biznesmenë të lidhur me tenderat e teknologjisë.
Kështu, ndërsa qeveria prezanton një kompani të re si garanci për transparencë, cilësi dhe përgjegjshmëri, AKSHI mbetet njëkohësisht edhe simboli i paradoksit më të madh të revolucionit dixhital shqiptar: institucioni që paraqitet si modeli i modernizimit të shtetit është po ai që vazhdon të figurojë në faqen zyrtare të SPAK-ut si pjesë e një dosjeje të profilit të lartë për korrupsion dhe grup të strukturuar kriminal.
