Komisionerja për Zgjerimin e Bashkimit Europian, Marta Kos, komentoi për herë të parë protestat në Shqipëri gjatë konferencës së 9-të ndërqeveritare Shqipëri-BE në Bruksel, duke theksuar se ato nuk rrezikojnë procesin e integrimit europian të vendit.
“Ne nuk e shohim të rrezikuar rrugëtimin e Shqipërisë drejt BE-së dhe prova është edhe dita e sotme, pasi kemi mbyllur tre kapituj,” u shpreh Kos.
E pyetur për protestat, komisionerja theksoi se mbrojtja e mjedisit është pjesë e kritereve themelore të Bashkimit Europian dhe kujtoi se Brukseli kishte rënë dakord me autoritetet shqiptare, edhe përpara nisjes së protestave, që gjatë këtij viti të shfuqizoheshin amendamentet e ligjit të vitit 2024 dhe ligji për investimet strategjike.
“Do t’i inkurajoja që ta bënin këtë sa më shpejt,” deklaroi ajo.
Kos shtoi se protestat janë pjesë e demokracisë, por rëndësi ka edhe mënyra se si shtetet reagojnë ndaj tyre.
“Protestat janë demokratike, por rëndësi ka edhe mënyra se si vendet i trajtojnë ato. Shqipëria duhet të harmonizojë legjislacionin,” përfundoi komisionerja europiane.
