Michael Schumacher, i cili sot është 56 vjeç, jeton i mbrojtur nga familja e tij dhe një rreth i ngushtë miqsh. Janë shumë pak ata që dinë për gjendjen e tij reale shëndetësore.
Adhuruesit e Formula 1 dhe ata që kanë një vend të veçantë në zemër për Michael Schumacher, shpesh ndihen të trishtë kur mendojnë për të. Sepse mendimi shkon automatikisht te e kaluara e tij e lavdishme, te arritjet me Ferrari-n, te ajo aureolë e pathyeshmërisë që kishte në kohët e tij më të mira, por edhe te aksidenti që i ndryshoi jetën, në vitin 2013. Ka kaluar shumë kohë që atëherë. Sot Schumacher është 56 vjeç dhe shumë pak dinë me të vërtetë se si është gjendja e tij. Pas aksidentit, vetëm pak persona mund ta shohin Schumacher-in Më 29 dhjetor 2013, shtatë herë kampioni i botës ishte në Francë, duke bërë ski në Meribel. Ai rrëzohet dhe përplaset me një shkëmb. Që nga ai moment, jeta e tij ndryshon tërësisht. Schumacher-i i nënshtrohet një operacioni urgjent dhe kalon disa muaj në koma. Më pas lë spitalin për të vazhduar trajtimin në një klinikë private, e më vonë, pas tetë muajsh, kthehet në shtëpi për të vijuar rehabilitimin. Që atëherë kanë kaluar shumë vite dhe familja nuk ka dhënë asnjë deklaratë zyrtare mbi gjendjen e tij. Një izolim i plotë. Një privatësi ekstreme. Bota e Schumi-t është e hapur vetëm për disa miq të ngushtë dhe të besuar. Vetëm një rreth i vogël njerëzish mund ta shohë ose ta vizitojë. Midis tyre është Jean Todt, i cili ka folur publikisht në disa raste. Disa vite më parë ai tha se kishte parë një garë Grand Prix së bashku me Schumacher-in. Djali ka lënë F1, vajza është martuar Gjendja e tij reale mbetet e panjohur. Thashetheme thuajse zero. Por jeta vazhdon. Djali i tij, Mick, ka garuar si pilot në Formula 1, ndërsa vajza, Gina Maria, është martuar. Sipas disa zërave, Schumacher mund të ketë qenë i pranishëm në dasmën e saj në Spanjë, megjithëse nuk ka konfirmime. Gina Maria tani është në pritje të një fëmije, dhe e dashura e Mick-ut thuhet se ka pasur mundësinë ta takojë Schumacher-in. Familja Schumacher u përball me një shantazh Megjithëse familja është gjithmonë e rezervuar, ajo është përballur edhe me situata të vështira, përfshirë një shantazh të mirëfilltë. Sabrina Khem, zëdhënësja e gjatë e Schumacher-it, tregoi për hetuesit se kishte marrë një telefonatë nga një person që kërkonte 15 milionë euro për të mos publikuar në "dark web" foto, video, informacione konfidenciale dhe dosjen mjekësore të Schumacher-it. Ky shantazh u zbulua dhe autorët u ndëshkuan. Avokati shpjegon arsyen e privatësisë ekstreme Ky incident përforcoi vendimin e familjes për të mbajtur privatësinë dhe për të mos zbuluar asnjë informacion mbi shëndetin e Michael Schumacher-it. Avokati gjerman Felix Damm, i cili që nga viti 2008 mbron interesat ligjore të familjes për çështje mediatike, shpjegoi në një intervistë pse u vendos të mos flitej kurrë për gjendjen e Schumacher-it: > "Me aksidentin, presioni i mediave ndryshoi në mënyrë radikale. Për të ulur presionin, gjatë takimeve me shtypin ku ishin të pranishëm edhe mjekët që e trajtonin, u dhanë informacionet e para të përgjithshme për shëndetin e Michael-it, por ato u klasifikuan si private." Ai shtoi: > "Bëhej fjalë për të mbrojtur privatësinë. Sigurisht, kemi diskutuar shumë për mënyrën më të mirë për ta bërë këtë. Madje kemi konsideruar mundësinë e një raporti përfundimtar mbi gjendjen e Michael-it. Por kjo nuk do të kishte mbaruar aty; përkundrazi, do të na detyronte të jepnim përditësime të vazhdueshme për gjendjen e tij, sepse nuk jemi ne që vendosim kur bie interesimi mediatik. Pas një deklarate, njerëzit do të pyesnin: ‘Si është tani?’. Dhe nëse do të vepronim kundër spekulimeve, do të përballeshim me çështjen e zbulimit të mëtejshëm të privatësisë."
