Presidenti i Studentëve Demokratë Europianë (EDS), Francesco Sismondini, iu bashkua protestës së shqiptarëve në Bruksel, e organizuar paralelisht me tubimin në Tiranë, ku protestuesit kërkojnë dorëheqjen e kryeministrit Edi Rama.
Në fjalën e mbajtur para protestuesve, Sismondini shprehu mbështetjen për lëvizjen qytetare në Shqipëri, duke theksuar se rinia shqiptare është kthyer në një burim frymëzimi për të rinjtë në mbarë Europën.
“Studentë, po lind një lëvizje e re në Europë dhe ne jemi këtu për t’ju mbështetur, për të sjellë zërin e të rinjve europianë në mbështetje të popullit shqiptar dhe rinisë shqiptare, e cila sot po na frymëzon”, u shpreh ai.
Sismondini tha se të rinjtë europianë po përballen me sfida të ngjashme, përballë qeverive që ai i cilësoi autoritare.
“Përballemi me qeveri autoritare, me diktatura në çdo cep dhe në çdo aspekt të jetës sonë. Sot, rinia shqiptare është e vetmja që po frymëzon të rinjtë europianë. Ne po ndjekim protestat që kanë vijuar prej më shumë se 40 ditësh. Ju falënderoj. Ju falënderoj nga zemra. Rama ik! Faleminderit në emër të rinisë së Europës”, deklaroi ai.
