Prokuroria e Tiranës kërkoi masën e detyrimit për paraqitje për 14 protestuesit e arrestuar pas tubimit të datës 1 shtator, ku rrethuan godinën e Kryeministrisë, në kohën kur shefi i qeverisë, Edi Rama, ndodhej në zyrën e tij. Ndaj protestuesve është kërkuar po ashtu ndalimi i qëndrimit në territoret e komisariateve nr. 1, 2 dhe 3 në Tiranë, që, nëse kjo masë caktohet, ata të mos mund të protestojnë më, të paktën për momentin.
Dritan Goxhaj, Junik Matoshi, Edison Lika, Erlind Almeta, Sokol Bushi, Lulzim Gjini, Valtion Shameti, Florian Manarkolli, Desiderjo Alimucaj, Bora Mitrovica, Arvina Lleshi, Ylli Brahaj, Arben Kola dhe Aumiraldi Dalliu u arrestuan mbrëmjen e 1 shtatorit dhe qëndruan në izolim për 72 orë.
Në seancë, ata kanë kërkuar deklarimin e paligjshëm të arrestimit dhe mos caktimin e asnjë mase sigurie.
Jashtë dyerve të gjykatës prej orësh qëndrojnë protestues të tjerë, që bëjnë thirrje për lirimin e tyre, ndërsa kërkojnë arrestimin e kryeministrit Rama dhe ish-zëvendëskryeministres Belinda Balluku.
