Policia e Tiranës ka proceduar penalisht katër deputetë të Partisë Demokratike dhe mbi 25 protestues, të cilët akuzohen për “Organizim dhe pjesëmarrje në grumbullime dhe manifestime të paligjshme” dhe “Pengim të qarkullimit të mjeteve të transportit”.
Në një protestë të organizuar nga Partia Demokratike, protestuesit bllokuan qarkullimin e automjeteve te Mbikalimi i Kamzës për rreth tre orë. Deputetët e proceduar për pjesëmarrje dhe organizim të kësaj proteste janë Flamur Noka, Albana Vokshi, Xhelal Mziu dhe Asllan Dogjani.
Protesta u zhvillua në ish-sheshin “Shqiponja”, ku qindra mbështetës të Partisë Demokratike u mblodhën, duke bllokuar lëvizjen dhe paralizuar qarkullimin e mjeteve në zonë. Në terren ishin të pranishme forca të shumta policore për të garantuar sigurinë dhe për të ndihmuar në rikthimin e qarkullimit të automjeteve.
Gjithashtu, bllokime të qarkullimit u raportuan edhe në kthesën e Kamzës, ku forcat e rendit ndërhynë për të shmangur përshkallëzimin e situatës dhe për të garantuar vijimësinë e lëvizjes.
