Një ngjarje e rëndë e regjistruar sot në Elbasan, ngjan se ka rikthyer hasmëritë dhe përplasjet e forta mes grupeve kriminale në këtë qytet.
Një 25-vjecar i identifikuar si Kristi Balukja mbeti i vrarë nga shpërthimi i një sasie tritoli, të cilën në orën 04.10 të mëngjesit të sotëm në lagjen “Shënkoll” po e montonte në makinën tip "Volksëagen", në pronësi të Renato Çepa.
Nga hetimet ka rezultuar se mina e telekomanduar shpërtheu, pasi në celularin me të cilën ishte lidhur, mbërriti një mesazh duke bërë aktivizimin. Nga shpërthimi Balukja pësoi plagë të rënda dhe më pas gjeti vdekjen.
Nga hetimet paraprake rezulton se 25-vjecari dhe shënjestra e tij Renato Çepa një vit më parë janë konfliktuar dhe Balukja është dhunuar. Dhe ky dyshohet paraprakisht motivi.
Por, hetuesit po hetojnë edhe të kaluarën e shënjestrës dhe viktimës.
Renato Çepa rezulton të jetë i skeduar për drogë në kuadër të grupit të Emiljano Ramazanit, i ekzekutuar më herët në Elbasan.
Ramazani njihej si një prej njerëzve me të besuar të klanit kriminal të drejtuar nga Franc e Hajdar Copja, vëllezër, organizatë e cila u godit nga SPAK korrikun e këtij viti. Ndaj dyshimet janë se mund të jenë rikthyer përplasjet e ashpër mes grupit kriminal Copja dhe atij të Erjon Alibej, që njihet si kundërshtar i përbetuar i tyre.
