Gjykata Penale e Brukselit ka dhënë dënime të ashpra në kuadër të gjyqit “Sky ECC”, që është një nga rastet më të mëdha të trafikimit të drogës në Belgjikë. Në total, janë dënuar 119 persona me dënime deri në 17 vjet burg dhe janë konfiskuar asete me vlerë rreth 60 milionë euro. Gjithashtu, janë dhënë dënime që në total arrijnë në rreth 700 vite burg. Ky proces është pjesë e hetimeve mbi komunikimet e enkriptuara përmes platformës Sky ECC, të cilat autoritetet arritën të deshifrojnë, duke zbuluar rrjetet e trafikut të drogës dhe krimin e organizuar.
Drejtësia belge ka kërkuar gjithashtu arrestimin e 58 personave, të cilët deri tani ishin hetuar në gjendje të lirë.
Dyshohet se këta persona, mes të cilëve shumë shqiptarë, mund të arratisen ose të kryejnë sërish vepra penale.
Një prej drejtuesve, 51-vjeçari shqiptar Eridan M, u dënua me 14 vjet burg (një vit më pak se afati i kërkuar nga Prokuroria Federale). 20 milionë euro nga pasuria e tij janë sekuestruar.
129 të pandehur (124 persona, katër kompani dhe një palë anonime), duke përfshirë shtetas belgë, shqiptarë, kolumbianë, algjerianë dhe francezë, ishin pjesë e disa bandave të drogës që së bashku formuan një rrjet të madh kriminal që mbikëqyrte kontrabandën dhe trafikun e kokainës dhe kanabisit.
