Drejtori i Përgjithshëm i Policisë së Shtetit, Skënder Hita, bëri të ditur se strukturat e Hetimit të Krimit Kibernetik po hetojnë një aktivitet të dyshuar të koordinuar në internet, i cili sipas autoriteteve synon të dëmtojë reputacionin e bizneseve turistike dhe imazhin e Shqipërisë si destinacion turistik.
Sipas Hitës, gjatë ditëve të fundit janë evidentuar publikime masive të komenteve dhe vlerësimeve negative ndaj hoteleve, restoranteve, resorteve dhe subjekteve të tjera turistike në platformat ndërkombëtare të vlerësimit. Nga verifikimet paraprake dhe kallëzimet e administruara kanë dalë indicie për ekzistencën e një rrjeti llogarish që kanë vepruar në mënyrë të sinkronizuar, me synimin për të krijuar një perceptim të rremë dhe për të dëmtuar artificialisht reputacionin online të bizneseve shqiptare.
Policia bën të ditur se deri tani janë identifikuar mbi 10 mijë llogari me modele aktiviteti të dyshimtë, të cilat po verifikohen nga strukturat e specializuara. Sipas hetimeve paraprake, një pjesë e konsiderueshme e tyre janë krijuar rishtazi dhe dyshohet se janë përdorur vetëm për këtë aktivitet, ndërsa janë identifikuar edhe profile reale që po hetohen.
Autoritetet kanë konstatuar raste kur e njëjta llogari ka publikuar brenda pak minutash vlerësime negative për biznese në Tiranë, Durrës, Vlorë, Sarandë, Elbasan, Shkodër dhe Korçë. Sinkronizimi i kohës së publikimeve, ngjashmëria e përmbajtjes dhe mënyra e shpërndarjes së komenteve janë elementët kryesorë që po analizohen për të përcaktuar nëse bëhet fjalë për një veprimtari të organizuar.
Hita theksoi se, nëse provohet se aktiviteti ka qenë i qëllimshëm, ai nuk cenon vetëm interesat e bizneseve të prekura, por edhe konkurrencën e ndershme, besimin e konsumatorëve dhe imazhin e Shqipërisë si destinacion turistik.
Drejtori i Policisë njoftoi se ka urdhëruar intensifikimin e hetimeve për identifikimin e autorëve, gjurmimin e infrastrukturës teknike të përdorur, analizimin e lidhjeve mes llogarive dhe sigurimin e provave dixhitale, në bashkëpunim me platformat online dhe partnerët ndërkombëtarë.
Sipas Policisë së Shtetit, materialet procedurale do t’i referohen Prokurorisë, pasi deri tani ekzistojnë dyshime për elemente të veprave penale në fushën e krimeve kompjuterike, si dhe për dëmtim të interesave ekonomike dhe reputacionit të bizneseve. Policia u ka bërë thirrje administratorëve të hoteleve, restoranteve dhe subjekteve turistike që kanë konstatuar raste të ngjashme të paraqesin kallëzim dhe të ruajnë çdo provë elektronike që mund t’i shërbejë hetimit.
