Ish-politikania Monika Kryemadhi i kërkoi GJKKO-së shpalljen e papërdorshme të tabulateve të zbardhura nga celulari i saj i sekuestruar. Sipas Kryemadhit, celulari është sekuestruar në mënyrë të paligjshme, pasi në atë periudhë ajo ka qenë deputete. Marrja e një prove në mënyrë të paligjshme e bën edhe atë të tillë.
Monika Kryemadhi thotë se, pavarësisht se i vuri në dijeni agjentët e BKH-së se celulari i sekuestruar ishte i saji, ata sërish e morën.
Kur e ka kundërshtuar në gjykatë, celulari nuk i është vënë në dispozicion, duke pranuar kërkesën e SPAK-ut, i cili pretendon se telefoni nuk është i saj, por i nënës së saj.
Megjithatë, nga ky celular, tha ish-deputetja, është përpiluar aktakuza ndaj saj.
“Organi i akuzës nuk duhej të vinte për kontroll në banesën time, pasi unë isha deputete. Organi i akuzës e dinte që ne jetonim në një banesë. Organi i akuzës e dinte që, kur është bërë kontrolli, është kontrolluar dhoma ime e gjumit, pavarësisht se ishte në emër të Fatime Kryemadhit”, theksoi ajo.
