Në vitin 1958, Ministri i Bujqësisë, Maqo Çomo, i propozoi Kryeministrit Mehmet Shehut që 24 pishat e buta të Bulevardit Stalin (sot Bulevardi Dëshmorët e Kombit) në Tiranë të zëvendësoheshin me mimoza, rrënjët e të cilave nuk do të prishnin pllakat dhe do të lulëzonin në muajin shkurt.
Vetë Kryeministri Shehu, si specialist i bujqësisë, duket se nuk e pëlqeu idenë e zëvendësimit të pishave të buta, të mbjella në bulevard gjatë kohës së mbretërisë sipas planit të arkitektëve italianë me mimoza, por rekomandoi zëvendësimin e tyre me pemë bliri.
Për këtë shënoi një koment me shkrim dore, duke theksuar se për këtë ishte dakord dhe shoku Enver. Ky shënim me shkrim dore në dokument, i Kryeministrit Shehu i datuar 18.12.1958, pra dy ditë pas propozimit të Ministrisë, shpreh qartë urdhërin e ri: "Jo mimoza por BLI, të mbillen peme... MSH." Qartësisht simbolizon centralizimin e vendimmarrjes në Shqipërinë komuniste, ku edhe detaje të tilla si lloji i pemëve në një bulevard madhor vendoseshin personalisht nga udhëheqësit kryesor.
Gjithsesi, duket se as ideja e mimozave, as ajo e blirit nuk u realizuan plotësisht në atë kohë, dhe pishat e buta, karakteristike për Tiranën moderne të projektuar nga arkitektë italianë sipas modeleve urbanistike të periudhës, nuk u prenë për t'u zëvendësuar.
